АВРОРА (AURORA)

Розувастатины USP (АНУ-н Фармакопей) 10 мг шахмал

НАЙРЛАГА

Хальсан бүрхүүлтэй шахмалд тус бүрд:

Розувастатинтай тэнцэх розувастатины кальци USP 10 мг

ЕРӨНХИЙ ШИНЖ

Розувастатин нь гидроксиметилглутарил-КоА редуктаза (ГМГ-КоА) ферментийг дарангуйлах нөлөө үзүүлдэг липид-бууруулах үйлдэлтэй нийлэг бэлдмэл.

Розувастатины кальцийн химийн нэр нь бис[(Е)-7-[4-(4-фторфенил)-6-изопропил-2-[метил (метил сульфонил) амино] пиримидин -5-ил] (3R,5S)-3.5-дигидроксигепт – 6 еноины хүчил] кальцийн давс юм.

Розувастатины кальцийн химийн томъёо нь (CR₂₂ RHR₂₇RFNR₃ROR₆RS) R₂RCa ба молекул жин нь 1001,14.

Розувастатины кальци нь ус болон метанолд сайн, этанолд сул уусдаг, цагаан өнгөтэй, тодорхой хэлбэргүй нунтаг бодис.

Розувастатины кальци нь 7,0 рН-ийн орчинд (октанол/ус) 0,13 хуваах коэффициенттой чийг татамхай бодис юм.

ЭМНЭЛЗҮЙН ЭМ СУДЛАЛ

Эмийн эмчилгээний бүлэг: Гидроксиметилглутарил-КоА редуктаза (ГМГ-КоА) ферментийг дарангуйлагч, липид-бууруулах бэлдмэл.

АТХ код: С10А А07

Үйлдлийн механизм

Розувастатин нь З-гидрокси-З метилглутарил коэнзим-А (ГМГ-КоА) -аас холестерины урьдал бодис буюу мевалоны хүчил болгож хувиргахад оролцдог ГМГ-КоА редуктаза ферментийг сонгомлоор өрсөлдөх дарангуйлагч юм. Розувастатины үйлчлэх үндсэн газар нь элэг бөгөөд энэ нь холестерины түвшнийг багасгах бай Розувастатин элэгний эсийн гадаргуу дээрх БНЛП (бага нягттай липопротеин)-ы рецепторын тоог ихэсгэн БНЛП-ны шингээгдэх болон задрах процессыг нэмэгдүүлэх ба түүнчлэн элгэн дэх МБНЛП (маш бага нягттай липопротеин)-ы нийлэгжилтийг дарангуйлж МБНЛП ба БНЛП-ны хэсгүүдийн нийт хэмжээг багасгадаг.

Фармакокинетик

Шимэгдэлт: Ууж хэрэглэсэн розувастатины сийвэн дэх концентраци 3-5 цагийн дараа дээд хэмжээндээ хүрдэг.

Биохүрэхүй: Pозувастатины туйлын биохүрэхүй нь 20%.

Тархалт: Тархалтын эзлэхүүн нь ойролцоогоор 134 л.

Розувастатины 90% нь уурагтай холбогддог.

Метаболизм: Элгэнд (10%) СҮР₂С₉ -ийн оролцоотойгоор метаболизмд ордог. (1 идэвхтэй метаболит танигдсан: N-диметил розувастатины ГМГ-КоА редуктаза-г дарангуйлах чадвар нь эх эмийнхээ 1/6-ээс 1/2 тэй тэнцдэг).

Хагас ялгарлын хугацаа: Розувастатины хагас ялгарлын хугацаа (t_1/2) 19 цаг орчим байдаг.

Гадагшлалт: ууж хэрэглэсний дараа розувастатин болон түүний метаболитууд нь голчлон (90%) өтгөнөөр гадагшилдаг.

ХЭРЭГЛЭХ ЗААЛТ БА ТУН

Хэрэглэх заалт:

Цусанд өөх тос ихсэх (гиперлипидеми) ба липидийн тэнцвэрт байдал холимог хэлбэрээр алдагдах (дислипидеми):

АВРОРА бэлдмэлийг анхдагч гиперлипидеми ба холимог дислипидемитэй насанд хүрэгчдэд - ерөнхий холестериныг, БНЛП-г, аполипопротеин В (Апо-B)-г, их нягтралт бус хэлбэрийн холестериныг, триглицеридийг бууруулах мөн их нягтралт холестериныг нэмэгдүүлэхийн тулд хоолны дэглэм дээр нэмэлтээр хэрэглэнэ. Ханасан өөх тос, холестериныг хязгаарласан хоолны дэглэм ба эмийн бус эмчилгээний үр нөлөө хангалтгүй байгаа тохиолдолд нэмж өгдөг.

Удамшлын гиперхолестеринеми гэх эмгэг бүхий хүүхдэд:

АВРОРА нь хоол эмчилгээтэй хавсарч

·          удамшлын гетерозигот гиперхолестеринемитой 8-17 насны хүүхэд, өсвөр насныханд хоолны дэглэм болон эмчилгээний бусад аргууд хэрэглэсэн ч БНЛП-Х 190 мг/дл –ээс буурахгүй эсвэл БНЛП-Х нь 160 мг/дл-ээс ихээс гадна удмын өвчлөлийн түүхэнд зүрх судасны эмгэг илэрсэн эсвэл хоёр болон түүнээс дээш тооны зүрх судасны өвчний эрсдэлтэй бол, ерөнхий холестерин, БНЛП–Х ба Апо В-ийн хэмжээг

·          энэхүү эмийг дангаар нь болон бусад липид бууруулах эмчилгээтэй (ж.нь: БНЛП аферез) хавсран удамшлын гомозигот гиперхолестеринемитой 7-17 насны хүүхэд, өсвөр насныханд ерөнхий холестерины, БНЛП-Х-ы, өндөр нягтралт бус ЛП-ийн, Апо В-ийн хэмжээг

буруулахад хэрэглэнэ.

Гипертриглицерид:

АВРОРА-г триглицеридын хэмжээ их байгаа насанд хүрсэн өвчтөнд хоол эмчилгээтэй хамт хэрэглэнэ.

Анхдагч дисбеталипопротеинеми (Гиперлипопротеинемийн III хэлбэр):

АВРОРА-г анхдагч дисбеталипопротеинеми илэрсэн өвчтөнд хоол эмчилгээтэй хамт хэрэглэнэ.

Удамшлын гомозигот хэлбэрийн гиперхолестеринеми:

Насанд хүрсэн өвчтөнд ерөнхий холестерины, БНЛП-Х-ы, өндөр нягтралт бус ЛП-ийн, Апо В-ийн хэмжээ буурахгүй байгаа үед энэхүү эмийг дангаар нь болон бусад липид бууруулах эмчилгээтэй (ж.нь: БНЛП аферез) хавсран удамшлын гомозигот гиперхолестеринемитой үед хэрэглэнэ.

Атеросклероз даамжралыг сааруулах:

АВРОРА-г атеросклерозоор оношлогдсон насанд хүрсэн өвчтөнд өвчний явцыг удаашруулах, ерөнхий холестерин ба БНЛП–ын хэмжээг зохист түвшинд буулгах зорилгоор хоол эмчилгээтэй хавсран хэрэглэнэ.

Зүрх судасны эмгэгийн анхдагч урьдчилан сэргийлэлт:

Зүрхний титэм судас дахь эмгэгийн шинж тэмдэг илрээгүй боловч цусны даралт ихсэх, ИНЛП-ийн хэмжээ багассан, тамхи татдаг, удмын өвчлөлийн түүхэнд залуу үеийн титэм судасны ишеми өвчин илэрсэн зэрэг хүчин зүйлүүдээс ядаж нэг тохиолдол илэрсэн хүмүүст болон ≥50 настай эрчүүдэд, ≥60 насны эмэгтэйчүүдэд, С-урвалжийн уураг ≥ 2 мг/л байх үед

·     тархинд нь цус харвах эрсдэл

·     зүрхний шигдээсээр өвдөх эрсдэл

·     судас нөхөн сэргээх мэс заслын орох эрсдэл

зэргээс урьдчилан сэргийлэхэд хэрэглэнэ.

Хэрэглээг хязгаарлах заалт: Розувастатины-г Фридрексоны I ба V хэлбэрийн дислипидемийн үед хэрэглэх аюулгүй байдлын судалгаа хийгдээгүй.

Хэрэглэх арга ба тун

AURORA бэлдмэлийг хоногт 5-40 мг тунгаар өдөрт 1 удаа ууж хэрэглэдэг. Эмчилгээг ихэнхдээ 10-20 мг тунгаар эхлүүлдэг. Бэлдмэлийн нэг тунг хооллолтоос үл хамааран өдрийн аль ч цагт ууж болно. Шахмалыг бүхлээр нь залгиж уух хэрэгтэй. Розувастатины кальцийн шахмалыг анх хэрэглэх эсвэл ГМГ-КоА редуктаза-г дарангуйлагч өөр эмийн хэрэглээнээс шилжих үед: зохистой тунгаар эхэлж, цаашдаа эмчилгээний үр дүн болон ​​зорилгод нийцүүлэн тунг титрлэж тохируулна. Хэрэглэж эхэлснээс эсвэл титрлэж тохируулсны дараа 2-4 долоо хоногийн дотор липидийн шинжилгээний дүнд үндэслэн тунг тохируулна. Хамгийн өндөр 40 мг тунг зөвхөн, розувастатины 20 мг тунгаар БНЛП-Х-ийн хэмжээ нь зорилтот түвшинд хүрч чадахгүй байгаа үед хэрэглэж болно.

Удамшлын гомозигот гиперхолестеринеми: зөвлөсөн эхлэх тун нь 20 мг-аар өдөрт 1 удаа. Эмчилгээний үр дүнг аферез эмчилгээний өмнө тодорхойлсон БНЛП-Х-ийн хэмжээгээр үнэлдэг.  

Зүрх судасны эмгэгээс урьдчилан сэргийлэх: зүрх судасны эмгэг үүсэх эрсдэлийн судалгаанд өдөрт 20 мг тунг ашигласан.

Анхдагч урьдчилан сэргийлэлт:

БНЛП-Х ≥ 190 мг/дл: өндөр зэргийн эрчимт эмчилгээ: өдөрт 1 удаа 20-40 мг тунгаар,

Чихрийн шижингийн 1 эсвэл 2-р хэв шинж бүхий 40-75 настай: дунд зэргийн эрчимт эмчилгээ: өдөрт 1 удаа 5-10 мг тунгаар

Чихрийн шижингийн 1 эсвэл 2-р хэв шинж бүхий 40-75 настай мөн ирэх 10 жилд зүрх судасны өвчнийг тооцоолсон эрсдэлийн зэрэг ≥ 7,5% : өндөр зэргийн эрчимт эмчилгээ: өдөрт 1 удаа 20-40 мг тунгаар,

40-75 настай мөн ирэх 10 жилд зүрх судасны өвчинг тооцоолсон эрсдлийн зэрэг ≥ 7,5%: дунд болон өндөр зэргийн эрчимт эмчилгээ: өдөрт 1 удаа 5-40 мг тунгаар

Хоёрдогч урьдчилан сэргийлэлт:

Судас хатуурлын шалтгаант зүрх судасны эмгэгийн эмнэлзүйн шинжүүд илэрсэн (жишээ нь: зүрхний ишеми, тархины цус харвалт/ишемийн түр зуурын дайрлага, судас хатуурлын шалтгаант захын судасны эмгэгүүд) болон титэм артерийн судас залгах мэс засал хийлгэсэн хүмүүст

·        Нас ≥ 75: өндөр зэргийн эрчимт эмчилгээ: өдөрт 1 удаа 20-40 мг тунгаар,

·        Нас < 75 эсвэл эмчилгээг их тунгаар хийх боломжгүй: дунд зэргийн эрчимт эмчилгээ: өдөрт 1 удаа 5-10 мг тунгаар

Хүүхдийн тун: 6-17 насны хүүхэд ба өсвөр үеийнхэн (Таннерийн ангиллаар <II-V)

Удамшлын гетерозигот гиперхолестеринеми: эхлэх тун өдөрт 1 удаа 5 мг-аар

·        6-9 настай хүүхдэд өдөрт 1 удаа 5-10 мг тунгаар уулгана. Энэ насны хүүхдэд 10 мг-аас дээш тунгаар хэрэглэсэн аюулгүй байдлын судалгаа хийгдээгүй.

·        10-17 настай хүүхдэд хүүхдэд өдөрт 1 удаа 10-20 мг тунгаар уулгана Энэ насны хүүхдэд 20 мг-аас дээш тунгаар хэрэглэсэн аюулгүй байдлын судалгаа хийгдээгүй.

Удамшлын гомозигот гиперхолестеринеми: 6-17 настай хүүхдэд хоногийн дээд тун нь 20 мг. Эхлэх тун нь нас, биеийн жин болон статины бүлгийн эмийн хэрэглээнээс хамаарч 5-10 мг-аар зөвлөсөн. Тунг аажмаар хамгийг ихдээ хоногт 20 мг хүртэл ихэсгэж болно.

Розувастатины эмчилгээг эхлэхээс өмнө хүүхдэд холестерин бууруулах стандарт хоолны дэглэмд хамруулсан байх ёстой, розувастатины эмчилгээний туршид энэхүү дэглэмийг үргэлжлүүлнэ.

Энэхүү насны бүлэгт хоногийн тун нь 20 мг-аас илүү хэрэглэсэн тохиолдол хязгаарлагдмал. 40 мг-ийн шахмалыг хүүхдийн эмчилгээнд хэрэглэхэд тохиромжгүй.   

Ази хүмүүст хэрэглэх тун

Ази гаралтай өвчтөний цусанд розувастатины концентрац ихсэх хандлагатай байдаг учир AURORA бэлдмэлийн эхлэх тун нь 5 мг-аар өдөрт нэг удаа байхыг харгалзан үзнэ. Ази өвчтнийг хоногийн 20 мг хүртэл тунгаар хяналтгүй эмчилгээнд оруулах явцад системийн өртөлт ихсэхийг анхааралдаа авах хэрэгтэй.  

Липид бууруулах хавсарсан эмчилгээ:

Цөсний хүчлийг холбогч давирхайтай хавсран хэрэглэвэл AURORA бэлдмэлийн БНЛП-Х-г болон нийт холестериныг бууруулах нөлөөг нэмэгдүүлэх боломжтой. Гемфиброзилтой хавсран хэрэглэх тохиолдолд AURORA-гийн тунг хязгаарлаж 10 мг тунгаар өдөрт нэг удаа хэрэглэнэ.

Онцгой бүлэг хүмүүс:

Бөөрний дутагдалтай өвчтөн:

Креатининий клиренс ≥30 мл/мин/1,73м²: тунгийн зохицуулалт хийх шаардлагагүй. Креатининий клиренс <30 мл/мин/1,73м²: Эхлэх тун: өдөрт 1 удаа 5 мг тунгаар (хамгийн их тун: 10 мг/өдөрт)

Элэгний дутагдалтай өвчтөн: Розувастатиныг элэгний идэвхтэй үрэвсэлтийн үед хэрэглэхийг хориглодог, учир нь элэгний трансаминазын түвшин тодорхой шалтгаангүйгээр ихэсдэг. Архины шалтгаант элэгний архаг үрэвсэлтэй хүмүүст розувастатины үйлдэл хүчтэй илэрдэг учраас эдгээр өвчтөнүүдэд болгоомжтой хандах хэрэгтэй.

Өндөр настны хэрэглээ: 65-аас дээш болон доош настан өвчтөнүүдэд тохиолддог гаж нөлөөний давтамж ойролцоо байдаг. 65-аас дээш ахмад насны популяци дахь розувастатины нөлөө залуу үеийнхэн дэх розувастатины нөлөөтэй харьцуулахад ойролцоо байсан. 70-с дээш насныханд эмийн эхлэх тун нь 5 мг. Өөр ямар нэг нэмэлт тунгийн зохицуулалт хийх хэрэггүй. Өндөр настанд зүрх судасны ямар нэг эмгэгийн эрсдэл их байдаг тул эмчилгээг болгоомжтой үргэлжлүүлэх хэрэгтэй.

6-аас доош насны хүүхдийн хэрэглээ: энэ эмийг бага насны хүүхдэд хэрэглэх аюулгүй байдлын туршилт, судалгаа хийгдээгүй учраас 6-аас доош насны хүүхдэд хэрэглэхийг зөвлөдөггүй.

Жирэмслэлт: Жирэмсний категори Х. Розувастатиныг жирэмсэн эсвэл жирэмсэлсэн байх магадлалтай эмэгтэйд хэрэглэдэггүй. Америкийн “Диабетийн холбоо”-ны удирдамжид ГМГ-КоА редуктазыг дарангуйлах эмийг, нөхөн үржихүйн насны эмэгтэйд найдвартай жирэмслэлтээс хамгаалах арга хэмжээгүйгээр хэрэглэж болохгүй гэж зөвлөсөн. Жирэмсэн ба нөхөн үржихүйн насны эмэгтэйд липид бууруулах шаардлагатай бол өөр бүлгийн эм сонгох хэрэгтэй. Жирэмслэхгүй байх өндөр тохиолдолд л өгөх боломжтой ба өвчтөнд болзошгүй эрсдэлийг тайлбарлах хэрэгтэй.

Хөхүүл эхийн хэрэглээ: розувастатин хөхний сүүтэйгээр гадагшилдаг (хязгаарлагдмал тооны мэдээлэл). Хөхүүл хүүхдэд үзүүлж болзошгүй ноцтой гаж нөлөөний улмаас хөхүүл эхэд хэрэглэхийг хориглоно.

Эмийн хордлого ба авах арга хэмжээ

Булчингийн сулрал, үйл ажиллагааны алдагдлын шинжүүд тод илэрвэл: эмийг зогсоож, цусанд креатин фосфокиназа, креатининыг; шээсэнд миоглобулиныг шалгах хэрэгтэй.

Булчингийн сулрал дунд зэрэг эсвэл бүдэг хэлбэрээр илэрвэл: хэрэглээг түдгэлзүүлэн нарийвчилсан үзлэг, шинжилгээ хийх ба өвчтөнд булчингийн эмгэгийг даамжруулж мэдэх эрсдэлт хүчин зүйл (бамбай булчирхай, элэг ба бөөрний дутагдал, ревматизм, стероид эмийн шалтгаант миопати, D витамины дутагдал эсвэл булчингийн анхдагч эмгэг) байгаа эсэхийг тогтооно. Хэрэв эдгээр хүчин зүйл байхгүй бол розувастатиныг арай бага тунгаар үргэлжлүүлэн өгнө. Харин булчингийн эмгэг шинж дахин илэрвэл энэ эмийн хэрэглээг зогсоож, статины бүлгийн өөр эмийг бага тунгаар хэрэглэж эхлэх ба зохимж сайтай байвал тунг нь аажмаар нэмэгдүүлж болно.

Тун хэтрэлт: Ийм тохиолдолд хийх тусгай эмчилгээ байхгүй. Энэ тохиолдолд шинж тэмдгийн эмчилгээ хийх ба шаардлагатай бол эрхтний ажиллагааг дэмжих арга хэмжээ авна. Элэгний үйл ажиллагааг болон креатинины түвшнийг хянах хэрэгтэй. Гемодиализ эмчилгээнд үр дүн өгөх магадлал бага.

ХОРИГЛОХ ЗААЛТ

Розувастатины кальцийн бэлдмэлийг дараах өвчтөнд хэрэглэхийг хориглоно:

·     Энэ бэлдмэлийн найрлагад орсон аль нэг бодист хэт мэдрэг болох нь тогтоогдсон бол хэрэглэхгүй. Загатнах, тууралт, чонон хөрвөс гарах, хошного хавагнах зэрэг хэт мэдрэгшлийн урвал мэдээлэгдсэн.

·     Сийвэнгийн трансаминазын хэмжээ шалтгаан тодорхойгүй ихсэх боломжтой идэвхтэй хэлбэрийн элэгний эмгэгтэй

·     Жирэмсэн эсвэл жирэмсэлсэн байх магадлалтай эмэгтэйчүүд

·     Хөхүүл эх

ГАЖ УРВАЛУУД

>10%

Мэдрэл булчингийн ба араг ясны: Өвдөлт (2-13%)

1-10%

Төв мэдрэлийн тогтолцооны талаас: Толгой өвдөх (6-9%), толгой эргэх (4%),

Дотоод шүүрэл, бодисын солилцоонд: Чихрийн шижин (шинээр оношлогдсон 3%),

Хоол боловсруулах тогтолцоонд: Дотор муухайрах (4-6%), өтгөн хатах (3-5%),

Шээс бэлгийн замд: Давсгийн үрэвсэл,

Элэгний талаас: АЛаТ ихсэх (2%; хэвийн дээд хэмжээнээс >3 дахин ихсэх),

Мэдрэл булчин ба араг ясны талаас: үе мөч өвдөх (4-10%), креатинфосфокиназ (3%, хэвийн дээд хэмжээнээс >10 дахин ихсэх; хүүхдэд 3%), ядарч сульдах (5 %),

< 1%, хэрэглээнд нэвтэрсний дараах тохиолдол: бамбай булчирхайн сорилд эмгэг илрэх, танин мэдэхүйн ажиллагаа хямрах (түр зуур ой санамж алдагдах, ухамсарт ухаан балартах, ой тогтоолт муудах), сэтгэл гутрах, глюкозжсон гемоглобин (HbA) ихсэх, эр хүний хөх томрох, шээсэнд бага зэрэг цус илрэх, элэгний дутагдал, элэгний эдийн үрэвсэл, хэт мэдрэгшлийн урвал (судас мэдрэлийн хаван, загатнаа, арьсны тууралт, чонон хөрвөс), дархлаа гажуудлын шалтгаант булчингийн үхжилт эмгэг, цусанд ГГТ, шүлтлэг фосфатаз, билирубин, глюкоз, трансаминаз ихсэх, уушгины завсрын эдийн эмгэг, арьс салст шарлах, шээсэнд миоглобин илрэх, булчингийн эмгэгшил, булчингийн эдийн үрэвсэл, нойр булчирхайн үрэвсэл, захын мэдрэлийн эмгэг, шээсээр уураг алдах (тунгаас хамаарна), бөөрний дутагдал, рабдомиолиз үүсэх, нойр хямрах (нойргүйдэх ба хар дарж зүүдлэх), ялтаст эсийн тоо цөөрөх шинжүүд мэдээлэгдсэн.

АНХААРУУЛГA, СЭРЭМЖЛҮҮЛЭГ

Эмийн гаж нөлөөтэй холбоотой илэрдэг асуудлууд:

·        Чихрийн шижин: Розувастатиныг хэрэглэх үед глюкозжсон гемоглобин (дунджаар: ~0,1%) ба өлөн үеийн глюкозын хэмжээ бага зэрэг нэмэгддэг, гэвч статин эмчилгээний үр ашиг нь дисгликемийн эрсдэлээс хамаагүй илүү юм.

·        Гематури/Протеинури: Розувастатиныг өдөрт 40 мг тунгаар ууж буй насанд хүрэгчдэд гематури (микроскоп) болон протеинури ажиглагдсан. Гэвч ихэвчлэн түр зуурынх байх ба бөөрний үйл ажиллагааны бууралттай холбоогүй. Хэрэв гематури/протеинури илэрсээр байвал тунг багасгах хэрэгтэй.

·        Элэг хордож байгаагийн шинж: Хэрэглээнд нэвтэрсний дараа үхэлд хүргэсэн болон хүргээгүй элэгний дутагдал ховор боловч мэдээлэгдсэн. Эмчилгээний явцад элэг хордох, билирубин ихсэх, арьс салст шарлах шинж илэрвэл эмчилгээг зогсоох ба хэрэв ийм байдалд хүргэсэн ямар нэг өөр шалтгаан байхгүй бол эмчилгээг үргэлжлүүлж болохгүй. Элэгний сорилыг эмчилгээ эхлэхийн өмнө ба элэгний хордлогын шинж илэрсэн үед хийх ёстой; харин эмчилгээний явцад тодорхой хугацаанд тогтмол хянах шаардлагагүй.

·        Хэт мэдрэгшлийн урвалууд: арьсны тууралт, загатнаа, чонон хөрвөс, судас мэдрэлийн хаван гэх мэт хэт мэдрэгшлийн урвалууд мэдээлэгдсэн. 

·        Дархлаа гажуудлын шалтгаант булчингийн үхжилт эмгэг: ГМГ-КоА редуктазыг дарангуйлах эм хэрэглэх үед дархлаа гажуудлын шалтгаант булчингийн эмгэг ховор боловч бүртгэгдсэн. Энэ эмгэг нь: КФК-ийн хэмжээ ихсэх, булчин зах хэсгээс төв рүүгээ даамжрах байдлаар сулрах шинжээр илрэх ба эмчилгээг зогсоосон ч хадгалагдсаар байдаг. Түүнээс гадна эдийн шинжилгээнд булчингийн үхжилт эмгэг, бага зэргийн үрэвсэл оношлогддог. Ийм тохиолдолд дархлаа гажуудлыг засах эмчилгээ (жишээ нь кортикостероидууд, азатиоприн) тустай байж болно.

·        Булчингийн эмгэгшил/рабдомиолиз (булчин задрах эмгэг): ГМГ-КоА-редуктазыг дарангуйлах эм хэрэглэсэн зарим тохиолдолд бөөрний цочмог дутагдалд хүргэсэн булчингийн задрал, эсвэл булчингийн эмгэгшил үүссэн нь бүртгэгдсэн; тиймээс эмчлүүлэгчдийг анхааралтай ажиглаж байх ёстой. Энэ эрсдэл нь эмийн тунгаас, липид бууруулах өөр бүлгийн (фиброны хүчил эсвэл ниациныг өдөрт 1г) эм, эсвэл колхицин гэх мэт булчингийн эмгэгшил үүсгэх гаж нөлөөт эм хавсран хэрэглэсэн эсэхээс хамааран нэмэгдэх ба мөн 65-аас дээш настай эмэгтэйчүүдэд, бас бамбай булчирхайн эсвэл бөөрний үйл ажиллагаа буурсан үед улам ихэсдэг. Тиймээс энэ эмийг бөөрний эсвэл бамбайн үйл ажиллагааны дутагдалтай болон булчингийн эмгэгт хүргэж болзошгүй эм хавсран хэрэглэж буй хүнд болгоомжтой хэрэглэнэ.

Суурь өвчнөөс шалтгаалан учирч болох хүндрэл:

Элэгний дутагдал ба архи: энэ эмийг архи их хэрэглэдэг болон элэгний өвчнөөр өвдөж байсан түүхтэй хүмүүст болгоомжтой хэрэглэ. Элэгний идэвхтэй үрэвсэлтэй, трансаминазын хэмжээ нь өндөр байгаа хүмүүст хэрэглэхийг хориглодог.

Бөөрний дутагдал: Креатинины клиренс (CrCl) <30 мл/мин/1,73м² байгаа, гемодиализ эмчилгээ хийгдээгүй өвчтөнд тунг тусгайлан тохируулах шаардлагатай. 

Тусгай бүлэг хүмүүс:

Ази гаралтай хүмүүст: Азийн хүмүүст розувастатинтай холбоотой булчингийн эмгэг илүү тохиолддог учраас тунг маш болгоомжтой тогтоох хэрэгтэй.

Өндөр настанд: Өндөр настанд булчингийн эмгэг үүсэх эрсдэл илүү их байдаг тул маш болгоомжтой хэрэглэх ёстой. 

Мэс засал: Том хэмжээний төлөвлөгөөт болон яаралтай мэс засал хийлгэх өвчтөн, мөн биеийн байдал нь хүнд, бөөрний дутагдалд хүргэж болох эмгэг бүхий (жишээ нь: цусан үжил, бэртэл гэмтэл, даралт нь буурсан, таталт нь эмчилгээнд намдахгүй байгаа) өвчтөнд хэрэглээг түр зогсоох хэрэгтэй. Гэвч мэс заслын үед статиныг зогсоосноор зүрх судасны хүндрэл, нас баралт ихэснэ гэж үзвэл ГМГ-КоА-редуктазыг дарангуйлах эмийн хэрэглээг завсарлахгүй байж болно.

Бусад анхааруулга,урьдчилан сэргийлэх арга хэмжээ:

Эмчилгээг эхлэхийн өмнө цусанд липид ихэсгэх өөр шалтгаан бий эсэхийг судлах ёстой. Розувастатиныг, сийвэнд хиломикрон ихсэх байдлаар илэрдэг анхдагч гиперлипидеми (Фридрексоны ангиллаар: дислипидемийн I ба V хэлбэр) үед хэрэглэх талаар судалгаа байхгүй.

Жолоо барих гэх мэт техниктэй харьцаж ажиллахад нөлөө үзүүлэх эсэх:

Аврора бэлдмэл нь жолоо барих, техниктэй харьцаж ажиллахад нөлөөлөх эсэхийг тусгайлан судлаагүй. Фармакодинамикийн онцлогоос нь дүгнэхэд энэ эм сөрөг нөлөө үзүүлэхгүй байх магадлалтай. Гэвч жолоо барих эсвэл хөдөлгөөнт техник ажиллуулж байх үед толгой эргэж болзошгүйг анхаар. 

ЭМИЙН ХАРИЛЦАН НӨЛӨӨЛӨЛ

Хамт хэрэглэсэн эмүүд розувастатинд нөлөөлөх

Циклоспорин: Эрүүл сайн дурын оролцогчдод розувастатиныг циклоспоринтой хавсран хэрэглүүлэхэд розувастатины дундаж AUC дангаар нь хэрэглэснээс 7 дахин нэмэгдсэн. Тиймээс циклоспорин эмчилгээтэй өвчтөнд розувастатин хэрэглэхийг хориглодог. Харин хамт хэрэглэсэн розувастатин циклоспорины концентрацийг өөрчилдөггүй.

Протеаза-г дарангуйлагч эмүүд: Протеаза-г дарангуйлагчид нь розувастатины үйлдлийг ихээхэн нэмэгдүүлдэг. Жишээ нь: Эрүүл сайн дурын оролцогчдод 10 мг розувастатиныг протеаза-г дарангуйлагч бүлгийн (300 мг атазанавир / 100 мг ритонавир) 2 эмтэй хавсран хэрэглүүлж туршихад розувастатины AUC 3 дахин, Cmax 7 дахин нэмэгдэж байсан. Тиймээс эдгээр эмийг хавсран хэрэглэх бол розувастатины кинетикийн өөрчлөлтийг бодолцон тунг сайтар тохируулж, болгоомжтой хэрэглэх ёстой. 

Гемфиброзил ба липид бууруулагч бусад эм: Розувастатин ба гемфиброзилийг хавсран хэрэглэх үед розувастатины Сmах болон AUC дунджаар 2 дахин нэмэгддэг.Судалгаанаас харахад эдгээр эмүүд фармакокинетикийн харилцан нөлөөлөлд ордоггүй ч фармакодинамикийн хувьд харилцан нөлөөлдөг гэж үздэг. Дангаар нь (өдөрт l гр эсвэл түүнээс их тунгаар) хэрэглэсэн ч булчингийн эмгэгшил (миопати) үүсгэх эрсдэлтэй гемфиброзил, фенофибрат, бусад фибратууд болон ниацины (никотиний) хүчил зэрэг эмүүдийг HMG-CoA редуктаз-г дарангуйлагчтай зэрэг хэрэглэвэл миопатийн эрсдэл улам нэмэгддэг. Тиймээс эдгээрийг нэг зэрэг хэрэглэх үед розувастатиныг 40 мг тунгаар хэрэглэдэггүй бөгөөд эмчилгээг 5 мг-аар эхлүүлнэ.

Эзетимиб: цусан дахь холестерины хэмжээ нь ихэссэн өвчтөнд 10 мг Розувастатин ба 10 мг эзетимибийг нэг зэрэг хэрэглэх үед розувастатины AUC 1.2 дахин ихэссэн. Мөн эдгээр эмүүд фармакодинамикийн харилцан нөлөөлөлд орж гаж нөлөө үүсгэх боломжтойг үгүйсгэх аргагүй.

Антацид: Розувастатиныг хөнгөн цагаан ба магнийн гидроксид агуулсан антацид бэлдмэлтэй хамт хэрэглэх үед сийвэн дэхь розувастатины концентраци 50% орчим буурдаг. Розувастатин ууснаас 2 цагийн дараа антацидыг уулгавал дээрх нөлөө багасдаг. Энэ харилцан нөлөөллийн эмнэлзүйн ач холбогдол судлагдаагүй.

Эритромицин: Розувастатин ба эритромициныг зэрэг хэрэглэх үед розувастатины AUC 20%, Cmax 30% буурдаг. Энэ харилцан нөлөөлөл нь эритромицины нөлөөгөөр гэдэсний гүрвэлзэх хөдөлгөөн түргэссэнтэй холбоотой байж болох юм.

 Цитохромын P450 ферментүүд: Розувастатин нь цитохром P450 изоферментийн дарангуйлагч эсвэл өдөөгч биш юм. Үүнээс гадна розувастатин нь эдгээр изоферментийн оролцоотой хувиралд ордоггүй. Тиймээс цитохром P450-ын оролцоотой хувиралд ордог эмүүдтэй харилцан нөлөөлдөггүй. Розувастатин ба флуконазол (CYP2C9 ба CYP3A4 дарангуйлагч) эсвэл кетоконазол (CYP2A6 ба CYP3A4 дарангуйлагч) эмүүдийн хооронд эмнэлзүйн хувьд ач холбогдолтой харилцан нөлөөлөл ажиглагдаагүй.

Розувастатин хамт хэрэглэж буй эмүүдэд нөлөөлөх

К витамины антагонист: ГМГ-КоА-редуктаз-г дарангуйлагч бусад эмүүдийн нэгэн адил, розувастатиныг К витамины антагонист (жишээ нь варфарин эсвэл кумарины бүлгийн аль нэг антикоагулянт) эмтэй зэрэг хэрэглэж эхлэх болон тунг нэмэгдүүлэх үед Олон Улсын Хэвийн Харьцаа (INR) нэмэгдэхэд хүргэж болзошгүй. Харин розувастатины тунг бууруулах эсвэл хэрэглээг зогсоох үед INR буурах болно. Иймд эдгээрийг хамт хэрэглэх үедээ INR үзүүлэлтийг тогтмол хянах ёстой. 

Жирэмслэлтээс хамгаалах ба даавар орлуулах эм: Ууж хэрэглэдэг жирэмслэлтээс хамгаалах эмүүдийг розувастатинтай хавсрах үед этинилэстрадиол/норгестрелийн AUC 26%/34% -р тус тус нэмэгддэг. Тиймээс эдгээр сийвэнгийн түвшнийг харгалзан үзэж жирэмслэлтээс хамгаалах эмийн тунг тохируулах хэрэгтэй. Эмэгтэй даавар орлуулах эм ба розувастатиныг хамт хэрэглэсэн хүмүүсийн фармакокинетикийн өгөгдөл байхгүй ч эмийн харилцан нөлөөлөл дээрхтэй адил төстэй байх магадлалтай.

Бусад эмийн бодисууд:

Дигоксин: Эмүүдийн харилцан нөлөөллийн судалгаанаас харахад, дигоксинтэй эмнэлзүйн хувьд ач холбогдол бүхий харилцан нөлөөлөлд ордоггүй.

Фузидийн хүчил: Розувастатин ба фузидийн хүчлийн хооронд харилцан нөлөөллийн туршилт судалгаа хийгдээгүй. Фузидийн хүчлийг статины бүлгийн эмтэй хавсран хэрэглэвэл миопати, түүний дотор рабдомиолиз үүсэх эрсдэл нэмэгддэг. Хэрэв фузидины хүчлээр эмчилгээ хийх шаардлага гарвал, эмчилгээний туршид розувастатины хэрэглээг зогсоох шаардлагатай.

ХАДГАЛАЛТ: 20-25°С температурын хооронд хуурай, харанхуй газар хадгална.

ЗААВАР: чийг, хэт халуун ба нарны гэрлийн үйлчлэлээс хамгаалж, хүүхэд хүрэхээргүй газарт хадгал.

Зөвхөн эмчийн жороор олгоно.

Хэрэглэж эхлэхийн өмнө эмийн зааврыг анхааралтай уншина уу.